हजुरको कदर कसरी गरुँ ? - प्रज्वल अधिकारी

हजुरको कदर कसरी गरुँ ?

कवि- प्रज्वल अधिकारी

हजुरसँग भेट हुँदा

- भित्र कतै जिरिङ्ग हुन्छ 

हजुर बोल्नुहुन्छ 

- कानहरू बुद्ध बनिदिन्छन् 

हजुरले हेर्नुहुन्छ

- प्रेम आएर मनको चौतारीमा थकाइ मार्छ

हजुर हाँस्नुहुन्छ 

- उमङ्गका बकुल्ला हृदयको आकासमा उड्छन्

हजुरले दुई बात के मिसाउनुहुन्छ 

- उन्मादको मर्स्याङ्दी उर्लिदिन्छ 

हजुर हुनुहुन्छ र त 

- दु:ख, पीडाहरूको याद पनि आउँदैन 

हजुरले म छु भन्नुहुन्छ 

- एक्लै हुँदापनि सँगै भएको आभास हुन्छ 

हजुरले के छ ? सोध्नुहुन्छ 

- ठिक बाहेक केही हुन्न मसँग 

यति ठूलो छ- प्रेमको संसार 

यति फराकिलो छ- सम्बन्धको बाटो 

यति गहिरो छ- नाताको इनार 

तर पनि म

- हजुरकै वरिपरि फन्को लाइरहन्छु 

- हजुरकै ठेगानाको बाटो धाइरहन्छु 

- हजुरकै नयनका राग गाइरहन्छु

हजुर हुनुहुन्छ भनेपछि 

- दिलको घारमा मौरीले श्रृङ्गार रसको मह मात्र काड्छन् 

हजुरको लागि भनेपछि 

- शब्दहरूले मखमली पच्छ्यौरी बुन्न थाल्छन् 

हजुर आउँने बाटोभरी 

- जुनकीरीले दीप बाल्छन् 

कसरी गरुँ हजुरको कदर 

सोच्दा सोच्दै हजुर आइपुग्नुभयो 

म माथी-

जाडो यामामा घामको किरण परे जस्तो भयो

पसिनाको नदीले छेउकुना हिर्कायो 

ओठमा एक किसिमको खडेरी जस्तो बसिदियो

पैतालाहरूमा अचम्मको काउकुती जस्तो लाग्यो 

मैले जानेका शब्दले के भनुँ हजुरलाई ?

मलाई थाहा भएका उपमाले के लेखुँ हजुरको बारे ?

कस्ता अलंकार हुन् हजुरलाई सुहाउने ?

के भनेर, के गरेर गरुँ हजुरको कदर ......?

-✍️प्रज्वल अधिकारी